Por Manuel Pérez Lourido
Anda
estos días a cousa revolta, como case sempre. Toda esta teima dos
escraches (semella nome de peixe) está a afogar aos deputados
do PP. Din eles que son un atentado as liberdades e envolven coa
palabra violencia as súas declaracións (de guerra) contra a
PAH. É raro que non exista nin unha soa denuncia no xulgado alegando
violencia, pero vivimos en tempos raros, xa lles digo. Como tamén é
raro, sigo dicindo eu, que unha xente aos que o abuso bancario (e
sobre iso ven de pronunciarse Europa, nada menos, non Andorra ou
Liechestain, Eu-ro-pa) quere deixar sen vivenda
permanezan
quietiños e calados a ver como lles escarallan a (triste) vida que
levan. Se un le as reclamacións da Plataforma anti-deshaucios que,
básicamente tenta acadar unha segunda oportunidade para xente que
quedaría sen teito e con poucos medios para vivir, entende que a
medida dos escraches é máis propia dos osos amorosos que
dunha ralea de insumisos aproveitados. Home, non é plato de gusto
que te espere a xente diante do teu portal e te “chame nomes”
pero, se es capaz de soportar as falcatruadas do “compañeiro”
Bárcenas, por exemplo, ben podes aturar esa incomodidade.
Agora a discusión é a “distancia prudencial” nos escraches.
Acabáramos. É comprensible que xente dun nivel social determinado
non queira sentir o alento nin o cheiro de outros que, se cadra, nin
os dentes cepillan a diario. Bueno, cadaquén no seu sitio: ou a ver
se a rúa pública vai a ser de todos, ou a ver se non existe un
dereito de proximidade que favorece as clases favorecidas, valga a
rebuznancia (nunca fixen este chisteciño con tanta propiedade).
Diante da tramitación da lei hipotecaria non é raro, entre tanta
rareza, que o partido gobernante non queira que se debata no
Congreso: é unha anormalidade democrática. Algo que afecta a un
colectivo tan amplo en todo o territorio español debería ser
tratado polas súas señorías e televisado en directo, en vez doutra
borralla. Eu é que hai xente, ou xentalla, á que lle facía
escraches no cerebelo, previa trepanación, claro.
Parece ser que o texto non contempla a dación en pago, como é
normal nun país onde se rescatan aos bancos e se afoga aos cidadáns.
Aos da pe, que os outros, ante o mínimo problema enseguidan topan
traballo en países exóticos. Borren o de “mínimo problema”,
aínda que para elés o é.
Se
alguén pensa que algún tipo de beneficio para “Juan Pueblo”
que teña en danza á banca deste país vai ser doado de acadar, que
repase á historia. Aquí ese tipo de victorias só veñen con moito
esforzo, moita loita, moito ruído e algún golpe. É tan triste coma
real.
Hai que lembrarlle a algúns que os antidesfiuzamentos no comezaron
polos escraches: primeiro denunciaron nos xulgados, despois
manifestáronse, recolleron sinaturas e presentaron a ILP. Agora
eles, perseguidos e acosados, decidiron perseguir e acosar aos
políticos. Chámanlles nazis, sí, sí.
PAH=
Plataforma de Afectados pola Hipoteca
ILP=
Iniciativa Legislativa Popular
No hay comentarios:
Publicar un comentario