Por Manuel Pérez Lourido
Unha
moza norteamericana, Eeza Khare, ven de inventar unha batería que
pode recargarse en 20 segundos. Fartouse de andar a cargar o móbil
un día si e outro tamén e dixo, pois nada, a ver que podo facer.
Entre botellón e praia (ten dezanove anos e vive en California)
adaptou un supercondensador (quen non sabe o que é un
supercondensador?) á súa idea. Pois claro. Como non se lle ocorrera
a ninguén antes? A ningún enxeñeiro a soldo das grandes compañías.
Como a extraordinaria ocorrencia de unificar os adminículos de carga
dos telefoniños. Mira que tardaron anos en darse conta. Estaban
ocupados en facer caixa vendendo cadanseu conexión, claro, e ou
cobras ou pensas. Esta rapaza dou en pensar e gañou trinta e pico
mil euros nun certame de mozos inventores. O primeiro premio déronllo
a un romanés (Siiiiiiii) por inventar un coche eléctrico sen
condutor. Ionut Budistenau (poño os nomes para que non sexa todo
Neymares e Bales) foi motivado pola estatística, algo que aburre ao
común dos mortais: púxose ao choio cando soubo que o 90% dos
accidentes son provocados por erros humanos. Bueno, supoño eu que
tamén o 90% dos acertos son provocados... pola humana destreza, e o
resto chiripa.
Pero
de quen quero falar é de Henry Wanjune Lin, tamén americano (e de
orixe moi patente). Presentou un traballo, premiado tamén, para
predicir a través de cálculos computacionais o comportamento das
galaxias. Non hai información dispoñible sobre que motivou a
Wanjune Lin a facelo, supoño que pola obviedade: quen, aos 20 ano,
non pensaba no comportamento das galaxias?. Por favor, se estabamos
todo o día noutras galaxias. "Hai outros mundos, pero están
neste" que dixera Paul Eluard.
A
min isto das galaxias é o invento que máis me mola: os outros
semellan moi inmersos na sociedade consumista que tanto nos
consume.Wanjune Lin, o galáctico, fainos flipar só de oír de que
vai o seu traballo. Despois seguro que algún falcón do Pentágono
acáballe atopando un uso vencellado á vella teima de escachar
cabezas, pero mentres todos somos Wanjune Lin. Bravo por el, por Eeza
Khare, por Ionut Budistenau e por todos os mozos e mozas que poñen o
seu talento a funcionar.
No hay comentarios:
Publicar un comentario