Por Manuel Pérez Lourido
Cando
ves de mazarte no ximnasio escribir sobre mazarte no ximnasio semella
un esforzo demasiado grande, polo que mellor consultar as noticias
online. As noticias online son as mesmas cas outras pero cambian a
cada rato, mellor dito, son sustituidas por outras semellantes que
duran pouco porque a súan vez van ser cambiadas por outras case
iguaias, e así coma nun dos infernos de Dante Alighieri, que era un
tipo listo de carallo. Remexer nos tópicos para topar un topic sobre
o que escribir é algo típico (tpc, tpc, dánse conta?). Cando
chegas ao estremo de andar a esplicar os truquiños de todo a cen que
empregas, é que a cousa anda moi mal. Estabamos remexendo nos
tópicos, pero alí só hai ácaros e bágoas, unha enchente de po
cubrindo o pranto pasado e presente. Un carrusel de saudade que da
noxo e alerxia. Tamén podía dar nécoras, digo eu, pero por dicilo
nunca pasou nada.
Se
me desen unha nécora por andar a voltas cos tópicos, non escribiría
doutra cousa ata o primeiro lavado de estómago. Pero eiquí estamos
dándolle voltas e voltas á realidade ata volvela do revés como se
fose un saco (que o é, en non direi de qué) tentando atopar algo
que encenda o piloto automático do motor que fai ruxir as palabras,
patinar as frases, despegar os parágrafos e finalmente aterrar ao
texto. Pero non, hoxe non hai unha panca que mova o mundo da
imaxinación e os cabaliños da feria fican murchos baixa unha luz
cenital que amosa a pintura gastada, os rabuñazos na madeira, o
ferro enferruxado das barras ferro, mentres soa una tristeira música
sen músicos. Nin sequera un par de cativos que paseen comendo nubes
de algodón. As nubes son de xullo e xa non levan choiva, pero aínda ímonos queixar igual.
A
veces quixeras que as cousas pasasen coma nas películas de
hollywood, esas que escriben ben remunerados guionistas que teñen a
cabeza a paxaros e quen falara aos seus personaxes como nunca falou
nin falará ninguén no esférico mundo. Sempre meten na comedia
algunha escea dramática e nas pelis dramáticas algunhas esceas
cómicas. É un vicio como outro calquera, caen nel unha e outra vez.
A min as cousas asemellánseme máis a unha película europea, lenta
e ás veces torpe, con máis ínfulas das debidas, con actores feos
ou semi-feos e música para ovellas, ou polo menos que che fai
pensar ovellas. Isto de comparar a realidade cun filme é algo que
supoño que xa fixeron cinco de cada seis escritores que xamáis
chegaron a ningunha parte, que no fondo é do que se trata, tampouco
se está tan mal por eiquí. O caso é que ás veces quixeras que
todo fose diferente, non sabes poñer os límites desa diferenza,
pero esa idea fai que te sintas excluido da felicidade e iso disque
vai moi ben para escribir, que por suposto, tamén é, máis que
nada, do que se trata.
No hay comentarios:
Publicar un comentario